நீங்கள் தேடியது "இந்தியா ஆஸ்திரேலியா தொடர்"

இந்தியா - ஆஸ்திரேலியா இடையிலான ஐந்தாவது மற்றும் கடைசி ஒருநாள் கிரிக்கெட் போட்டி டெல்லியில் நடைபெற்று வருகிறது. ஆஸ்திரேலிய அணியின் கேப்டன் ஆரோன் பிஞ்ச் டாஸ் வென்று பேட்டிங் தேர்வு செய்தார்.

ஆஸ்திரேலிய அணியில் ஷான் மார்ஷ், பெரேன்டர்ப் ஆகியோர் நீக்கப்பட்டு மார்கஸ் ஸ்டாய்னிஸ், நாதன் லயன் சேர்க்கப்பட்டனர். இந்திய அணியில் கேஎல் ராகுல், சாஹல் நீக்கப்பட்டு ஜடேஜா, முகமது ஷமி ஆகியோர் சேர்க்கப்பட்டனர்.

உஸ்மான் கவாஜா, ஆரோன் பிஞ்ச் ஆகியோர் தொடக்க வீரர்களாக களம் இறங்கினர். இருவரும் நிதானமாகவும், அதே நேரம் அடிக்கக்கூடிய பந்துகளை பவுண்டரிக்கும் விரட்டினர். அதனால் ஆஸ்திரேலியா 9.3 ஓவரில் 50 ரன்னைத் தொட்டது. ஆஸ்திரேலியாவின் ஸ்கோர் 76 ரன்னாக இருக்கும்போது ஆரோன் பிஞ்ச் 27 ரன்கள் எடுத்த நிலையில் ஜடேஜா பந்தில் க்ளீன் போல்டானார்.

அடுத்து கவாஜா உடன் ஹேண்ட்ஸ்காம்ப் ஜோடி சேர்ந்தார். இந்த ஜோடி அபாரமாக விளையாடியது. கவாஜா 48 பந்தில் அரைசதம் அடித்தார். 19.1 ஓவரில் 100 ரன்னைத் தொட்ட ஆஸ்திரேலியா 26.5 ஓவரில் 150 ரன்னைத் தொட்டது. இருவரும் நிலைத்து நின்று விளையாடியதால் ஆஸ்திரேலியாவின் ஸ்கோர் எளிதாக 300 ரன்னைத் தாண்டும் என்று எதிர்பார்க்கப்பட்டது.

102 பந்தில் 10 பவுண்டரி, 2 சிக்சருடன் கவாஜா சதம் அடித்தார். இந்தத் தொடரில் அவரின் 2-வது சதம் இதுவாகும். சதம் அடித்த அவர் 104 ரன்னில் ஆட்டமிழந்தார். அதன்பின் வந்த அதிரடி மன்னன் மேக்ஸ்வெல் 1 ரன்னில் ஜடேஜா பந்தில் ஆட்டமிழந்தார்.



நம்பிக்கையுடன் விளையாடிய ஹேணஸ்ட்காம்ப் 50 பந்தில் 4 பவுண்டரியுடன் அரைசதம் அடித்தார். தொடர்ந்து விளையாடிய அவர்  52 ரன்னில் முகமது ஷமி பந்தில் வெளியேறினார். அப்போது ஆஸ்திரேலியா 36.2 ஓவரில் 4 விக்கெட் இழப்பிற்கு 182 ரன்கள் எடுத்திருந்தது. அதன்பின் ஆஸ்திரேலியாவின் ரன் வேகத்தில் மந்த நிலை ஏற்பட்டது.

ஆஸ்திரேலியா 39.2 ஓவரில் 200 ரன்னைத் தொட்டது. கடந்த போட்டியில் இந்தியாவின் பந்து வீச்சை துவம்சம் செய்த ஆஷ்டோன் டர்னர் 20 ரன்கள் எடுத்த நிலையில் குல்தீப் யாதவ் பந்தில் ஆட்டமிழந்தார். அலெக்ஸ் கேரி 3 ரன்களில் எடுத்த நிலையில் ஷமி பந்தில் ஆட்டமிழந்தார்.

48-வது ஓவரை பும்ரா வீசினார். இந்த ஓவரில் ஆஸ்திரேலியா நான்கு பவுண்டரிகள் அடித்தது. இதனால் ஆஸ்திரேலியா 250 ரன்னைத் தாண்டியது.



கடைசி ஓவரை பும்ரா வீசினார். இந்த ஓவரில் 7 ரன்கள் விட்டுக் கொடுத்து ஒரு விக்கெட் கைப்பற்ற ஆஸ்திரேலியா 9 விக்கெட் இழப்பிற்கு 272 ரன்கள் சேர்த்தது. இதனால் இந்தியாவின் வெற்றிக்கு 273 ரன்கள் வெற்றி இலக்காக நிர்ணயித்துள்ளது.

இந்திய அணி சார்பில் புவனேஸ்வர் குமார் 3 விக்கெட்டும், முகமது ஷமி மற்றும் ஜடேஜா தலா இரண்டு விக்கெட்டுக்கள் வீழ்த்தினர்.

இந்தியா - ஆஸ்திரேலியா அணிகளுக்கு இடையிலான ஐந்து போட்டிகள் கொண்ட ஒருநாள் கிரிக்கெட் தொடர் நடைபெற்று வருகிறது. முதல் இரண்டு ஒருநாள் கிரிக்கெட் போட்டியில் இந்தியா வெற்றி பெற்றது. ஆனால், 3-வது மற்றும் கடைசி ஒருநாள் கிரிக்கெட் போட்டியில் ஆஸ்திரேலியா வெற்றி பெற்றது.

இதனால் தொடர் 2-2 என சமநிலையில் உள்ளது. நாளைய போட்டியில் ஆஸ்திரேலியா வெற்றி பெற்றால், முதன்முறையாக இந்திய மண்ணில் ஆஸ்திரேலியா முதன்முறையாக தொடரை கைப்பற்றும்.

இந்நிலையில் தொடரை தீர்மானிக்கும் கடைசி போட்டியில் விளையாட ஆவலாக இருக்கிறோம் என ஆஸ்திரேலிய அணியின் விக்கெட் கீப்பர் அலெக்ஸ் கேரி தெரிவித்துள்ளார்.

இதுகுறித்து அலெக்ஸ் கேரி கூறுகையில் ‘‘தொடரின் தொடக்கத்தில் நாங்கள் நெருக்கடிக்கு உள்ளானோம். முதல் இரண்டு போட்டிகளிலும் வெற்றியை நெருங்கி வந்து தோல்வியடைந்தோம். ஆனால் தற்போது 2-2 எனத் தொடரை சமன் செய்துள்ளோம்.

தொடரை தீர்மானிக்கும் நாளைய போட்டியில் விளையாட ஆவலாக இருக்கிறோம். இந்தியா தோல்வில் இருந்து மீண்டு வீறுகொண்டு திரும்பும் என்பது எங்களுக்குத் தெரியும். ஆனால், நாங்கள் இந்தியாவை எதிர்கொள்ள ஆவலாக இருக்கிறோம்’’ என்றார்.

இந்தியா - ஆஸ்திரேலியா அணிகளுக்கு இடையில் ஐந்து போட்டிகள் கொண்ட ஒருநாள் கிரிக்கெட் தொடர் நடைபெற்று வருகிறது. உலகக்கோப்பைக்கு முந்தைய கடைசி தொடர் இது என்பதால், இந்தியா உலகக்கோப்பைக்கான அணியை தேர்வு செய்துவிடும், உலகக்கோப்பைக்கான ஆடும் லெவன் அணியுடன் களம் இறங்கும் என எதிர்பார்க்கப்பட்டது.

ஆனால், ஆஸ்திரேலியா தொடருக்கான காம்பினேசன் உலகக்கோப்பை தொடரில் பயன்படுத்தப்படாது என்று இந்திய அணியின் பந்துவீச்சு பயிற்சியாளர் பரத் அருண் தெரிவித்துள்ளார்.

இதுகுறித்து பரத் அருண் கூறுகையில், “ஆஸ்திரேலியா தொடருக்கான காம்பினேசன் உலகக் கோப்பையில் பயன்படுத்த வேண்டும் என்ற அவசியம் இல்லை. ஆனால் வீரர்கள் மாறுபட்ட சூழ்நிலையில் எப்படி பந்து வீசுகிறார்கள் என்பதை நாங்கள் தெரிந்து கொள்ள வேண்டும். அப்போதுதான் சரியான பேலன்ஸ் அணியை தேர்வு செய்ய முடியும்.

ஏறக்குறைய அணியின் காம்பினேசன் முடிவு ஆகிவிட்டது. ஆனால் உலகக் கோப்பைக்கு முன் அனைத்து வாய்ப்புகளையும் முயற்சி செய்து பார்க்க விரும்புகிறோம். உலகக் கோப்பை போன்ற மிகப்பெரிய தொடருக்கு முன் நாங்கள் என்ன விரும்புகிறமோ, அதில் மிகவும் உறுதியாக இருக்க விரும்புகிறோம்.

தற்போது தொடர்ந்து இரண்டு முறை 300 ரன்களுக்கு மேல் விட்டுக் கொடுத்ததை பார்ப்பது மகிழ்ச்சியே. இது உலகக் கோப்பைக்கு முன் நாங்கள் முன்னேற்றம் அடைய ஏராளமான காரணிகளை கொடுத்துள்ளது.

பந்து வீச்சு மற்றும் பேட்டிங்கில் குறிப்பிட்ட பகுதியில் கவனம் செலுத்துவது அவசியம். என்ன நடந்தாலும் நேர்மறையான கருத்தில் நிலையாக இருப்பது அவசியம். ஆஸ்திரேலியா தொடர் மிகச்சிறந்த அனுபவம்” என்றார்.

இந்தியா - ஆஸ்திரேலியா இடையிலான 5-வது மற்றும் கடைசி ஒருநாள் கிரிக்கெட் போட்டி நாளை டெல்லி பெரோஸ் ஷா கோட் மைதானத்தில் நடக்கிறது. இந்த போட்டியில் வெற்றிபெறும் அணி தொடரை கைப்பற்றும் என்பதால் ஆட்டம் பரபரப்பானதாக இருக்கும் என்பதில் எந்த சந்தேகமும் இல்லை.

இந்திய அணியின் தொடக்க பேட்ஸ்மேன் ஆன ரோகித் சர்மா இதுவரை ஒருநாள் போட்டியில் 7954 ரன்கள் எடுத்துள்ளார். நாளைய போடடியில் 46 ரன்கள் அடித்தால் 8 ஆயிரம் ரன்கள் அடித்த 8-வது இந்திய வீரர் என்ற பெருமையை பெறுவார்.

நாளைய போட்டியின் சில சிறப்பம்சங்கள்:-

இந்தியா இதுவரை ஆஸ்திரேயாவுக்கு எதிராக 49 போட்டிகளில் வெற்றி பெற்றுள்ளது, நாளைய போட்டியில் வெற்றி பெற்றால், 50 வெற்றிகளை பெற்ற 3-வது அணி என்ற பெருமையை பெறும். இதற்கு முன் இங்கிலாந்து மற்றும் வெஸ்ட் இண்டீஸ் அணிகள் ஆஸ்திரேலியாவுக்கு எதிராக 50 வெற்றிகளை பெற்றுள்ளது.

இந்தியா வெற்றி பெற்றால், விராட் கோலி தலைமையிலான இந்திய அணி 50 வெற்றிகளை ருசிக்கும். மேலும் 50-க்கு மேல் வெற்றிகளை பெற்ற நான்காவது கேப்டன் என்ற பெருமையை பெறுவார்.

பேட் கம்மின்ஸ் நான்கு விக்கெட்டுக்கள் வீழ்த்தினால் சர்வதேச கிரிக்கெட்டில் 200-வது விக்கெட்டை பதிவு செய்வார். டெஸ்டில் 94 விக்கெட்டுக்களும், ஒருநாள் போட்டியில் 77 விக்கெட்டுக்களும், டி20 போட்டியில் 25 விக்கெட்டுக்களும் கைப்பற்றியுள்ளார்.

ஆரோன் பிஞ்ச் இன்னும் 14 ரன்கள் அடித்தால் ஒருநாள் போட்டியில் இந்தியாவுக்கு எதிராக 1000 ரன்னைத் தொடுவார்.

இந்தியா - ஆஸ்திரேலியா இடையிலான 4-வது ஒருநாள் கிரிக்கெட் போட்டி நேற்று மொகாலியில் நடைபெற்றது. முதலில் பேட்டிங் செய்த இந்தியா 358 ரன்கள் குவித்தது. பின்னர் 359 ரன்கள் அடித்தால் வெற்றி என்ற இலக்குடன் களம் இறங்கிய ஆஸ்திரேலியா 47.5 ஓவரில் 6 விக்கெட் இழப்பிற்கு 359 ரன்கள் குவித்து அபார வெற்றி பெற்றது.

இந்த வெற்றியின் மூலம் ஒருநாள் கிரிக்கெட் வரலாற்றில் அதிக ரன்களை சேஸிங் செய்து ஆஸ்திரேலியா சாதனைப் படைத்துள்ளது.

நேற்றைய போட்டியில் படைக்கப்பட்ட சாதனைகள் பின்வருமாறு:-

1. 2012-13-ம் ஆண்டிற்குப் பிறகு இந்தியா, சொந்த மண்ணில் தற்போது இரண்டு போட்டிகளில் அடுத்தடுத்து தோல்வியை சந்தித்துள்ளது.

2. பேட் கம்மின்ஸ் 70 ரன்கள் விட்டுக்கொடுத்து 5 விக்கெட்டுக்கள் கைப்பற்றினார். இதன்மூலம் அதிக ரன்கள் விட்டுக்கொடுத்து ஐந்து விக்கெட்டுக்கள் கைப்பற்றியவர்கள் பட்டியலில் நான்காவது இடத்தை பிடித்துள்ளார்.

3. நேற்றைய போட்டியில் தவான் - ரோகித் சர்மா ஜோடி 100 ரன்களுக்கு மேல் குவித்தது. இதன்மூலம் அதிக சதங்கள் கண்ட ஜோடி பட்டியலில் 3-வது இடத்தை பிடித்துள்ளது. சச்சின் தெண்டுல்கர் - சவுரவ் கங்குலி ஜோடி 21 சதங்களும், கில்கிறிஸ்ட் - மேத்யூ ஹெய்டன் ஜோடி 16 சதங்களும் அடித்துள்ளது.

4. 143 ரன்கள் அடித்த ஷிகர் தவான், ஒருநாள் போட்டியில் அதிகபட்ச ஸ்கோரை பதிவு செய்துள்ளார். இதற்கு முன் தென்ஆப்பிரிக்காவிற்கு எதிராக 137 ரன்கள் அடித்ததுதான் அதிகபட்ச ஸ்கோராக இருந்தது.

5. 3-வது விக்கெட்டுக்கு கவாஜா - ஹேண்ட்ஸ்காம்ப் ஜோடி 192 ரன்கள் குவித்தது. இந்தியாவில் இந்தியாவுக்கு எதிராக ஆஸ்திரேலியாவின் அதிகபட்ச ஸ்கோர் இதுவாகும்.



6. தவான் - ரோகித் சர்மா ஜோடி 193 ரன்கள் குவித்தது. ஆஸ்திரேலியாவுக்கு எதிராக இந்தியாவின் தொடக்க ஜோடியின் அதிகபட்ச ஸ்கோர் இதுவாகும்.

7. 359 ரன்களை சேஸிங் செய்தது ஆஸ்திரேலியாவின் மிகப்பெரிய சேஸிங் ஆகும். மேலும் ஒருநாள் கிரிக்கெட்டில் ஐந்தாவது மிகப்பெரிய சேஸிங் ஆகும்.

8. இந்தியாவிற்கு எதிரான மிகப்பெரிய சேஸிங் ஸ்கோர் இதுவாகும். இதற்கு முன் இதே மைதானத்தில் 2007-ல் பாகிஸ்தான் 322 ரன்களும், ஓவலில் 2017-ல் இலங்கை 322 ரன்களையும், 2005-ல் அகமதாபாத்தில் நடைபெற்ற ஆட்டத்தில் பாகிஸ்தான் 316  ரன்களையும் சேஸிங் செய்துள்ளது.

இந்தியா - ஆஸ்திரேலியா இடையில் ஐந்து போட்டிகள் கொண்ட ஒருநாள் கிரிக்கெட் தொடர் நடைபெற்று வருகிறது. முதல் இரண்டு போட்டிகளிலும் இந்தியா வெற்றி பெற்றது. ராஞ்சியில் நடைபெற்ற 3-வது ஒருநாள் போட்டியில் ஆஸ்திரேலியா வெற்றி பெற்றது.

இந்நிலையில் 4-வது ஒருநாள் போட்டி மொகாலியில் நடைபெறுகிறது. இதற்கான டாஸ் சுண்டப்பட்டதில் இந்திய அணி கேப்டன் விராட் கோலி டாஸ் வென்று பேட்டிங் தேர்வு செய்துள்ளார்.

இந்திய அணியில் நான்கு மாற்றங்கள் செய்யப்பட்டுள்ளது. கேஎல் ராகுல், சாஹல், புவனேஸ்வர் குமார் மற்றும் ரிஷப் பந்த் ஆகியோர் அணியில் சேர்க்கப்பட்டுள்ளனர். அம்பதி ராயுடு, முகமது ஷமி, ஜடேஜா, டோனி நீக்கப்பட்டுள்ளனர்.

இந்தியா - ஆஸ்திரேலியா இடையிலான இரண்டு போட்டிகளை கொண்ட டி20 தொடர் நேற்றுடன் முடிவடைந்தது. இரண்டு போட்டியிலும் ஆஸ்திரேலியா வெற்றி பெற்றது.

இரண்டு போட்டிகளிலும் ஆஸ்திரேலியா வெற்றி பெற்ற மேக்ஸ்வெல் முக்கிய காரணமாக இருந்தார். முதல் ஆட்டத்தில் அரைசதம் அடித்த அவர், 2-வது போட்டியில் சதம் அடித்தார். இதனால் ஆட்ட நாயகன் விருதுடன் தொடர் நாயகன் விருதையும் தட்டிச் சென்றார்.

டி20 கிரிக்கெட் போட்டியில் நான்காவது இடத்தில் களம் இறங்கிய அவர், ஒருநாள் போட்டியில் 7-வது இடத்திற்குப் பிறகு களம் இறங்கி விளையாடுகிறார். டி20 கிரிக்கெட் போட்டியை போல் ஒருநாள் போட்டியிலும் நான்காவது இடத்தில் களமிறங்கி விளையாட விரும்புகிறேன் என்று மேக்ஸ்வெல் தெரிவித்திருந்தார்.

இந்நிலையில் அவர் தொடர்ச்சியாக சிறப்பான ஆட்டத்தை வெளிப்படுத்தட்டும். அதன்பின் பார்க்கலாம் என்று ஆஸ்திரேலிய அணியின் தலைமை பயிற்சியாளரான ஜஸ்டின் லாங்கர் தெரிவித்துள்ளார்.

இதுகுறித்து ஜஸ்டின் லாங்கர் கூறுகையில் ‘‘நாங்கள் பொறுத்திருந்து பார்க்க வேண்டும். அணிக்கு எது சிறந்ததோ, அதை நாங்கள் செய்வோம். தற்போதுள்ள நிலை தொடர்ந்து எப்படி செல்கிறா? என்று பார்க்க வேண்டும்.

நாங்கள் அவரிடம் இருந்து என்ன எதிர்பார்க்கிறோம். அவரால் அதை செய்ய முடியும் என்பதை அவர் முதலில் சொல்ல வேண்டும். அந்த விஷயத்தை அவர் செய்தால், தானாகவே சிறந்த வீரராக உயர்வார். அவர் உலகத்தரம் வாய்ந்த வீரராகி இன்னும் அதிகமான வெற்றிகளை தேடித்தர வேண்டும் என்று அவரும் விரும்புகிறார். நாங்களும் விரும்புகிறோம். அப்படி அவர் செய்தால் சிறந்த வீரராக அங்கீகரிக்கப்படுவார்’’ என்றார்.

இந்தியா - ஆஸ்திரேலியா இடையிலான 2-வது மற்றும் கடைசி ஒருநாள் கிரிக்கெட் போட்டி பெங்களூரு சின்னசாமி மைதானத்தில் நடைபெற்று வருகிறது. டாஸ் வென்ற ஆஸ்திரேலியா பீல்டிங் தேர்வு செய்தது. இந்திய அணியில் ரோகித் சர்மா, உமேஷ் யாதவ், மார்கண்டே ஆகியோர் நீக்கப்பட்டு தவான், விஜய் சங்கர் மற்றும் சித்தார்த் கவுல் ஆகியோர் அணியில் சேர்க்கப்பட்டனர். ஆஸ்திரேலிய அணியில் மாற்றம் ஏதும் செய்யப்படவில்லை.

தவான் மற்றும் லோகேஷ் ராகுல் ஆகியோர் தொடக்க வீரர்களாக களம் இறங்கினார்கள். முதல் இரண்டு ஓவரில் இந்தியா 4 ரன்கள் எடுத்திருந்தது. 3-வது ஓவரில் இரண்டு பவுண்டரிகள் அடித்தது. 4-வது ஓவரில் இந்தியாவுக்கு ஒரு பவுண்டரி கிடைத்தது.

ஐந்தாவது ஓவரை ரிச்சர்ட்சன் வீசினார். இந்த ஓவரில் கேஎல் ராகுல் அடுத்தடுத்து இரண்டு சிக்சர்கள் விளாசினார். கம்மின்ஸ் வீசிய அடுத்த ஓவரிலும் அடுத்தடுத்து இரண்டு சிக்ஸ் விளாசினார். இதனால் இந்தியா பவர் பிளே-யான முதல் 6 ஓவரில் விக்கெட் இழப்பின்றி 53 ரன்கள் சேர்த்தது.

7-வது ஓவரை ஜம்பா வீசினார். இந்த ஓவரில் ஒரு பவுண்டரியுடன் இந்தியா 8 ரன்கள் சேர்த்தது. 8-வது ஓவரை கவுல்டர் நைல் வீசினார். இந்த ஓவரின் முதல் பந்தில் கேஎல் ராகுல் ஆட்டமிழந்தார். அவர் 26 பந்தில் 3 பவுண்டரி, 4 சிக்சருடன் 47 ரன்கள் சேர்த்தார். அப்போது இந்தியா 61 ரன்கள் எடுத்திருந்தது.

மறுமுனையில் விளையாடிய தவான் 24 பந்தில் 14 ரன்கள் சேர்த்து வெளியேறினார். ரிஷப் பந்த் 1 ரன் எடுத்த நிலையில் ஏமாற்றம் அளித்தார். இதனால் இந்தியா 11 ஓவரில் 74 ரன்கள் எடுப்பதற்குள் 3 விக்கெட்டுக்களை இழந்தது.

4-வது விக்கெட்டுக்கு விராட் கோலியுடன் டோனி ஜோடி சேர்ந்தார். தொடக்கத்தில் வாய்ப்பு கிடைக்கும் போதெல்லாம் இருவரும் பந்தை பவுண்டரிக்கு விரட்டினர். இதனால் 14.1 ஓவரில் இந்தியா 100 ரன்னைத் தொட்டது. அதன்பின் இருவரும் அதிரடி ஆட்டத்தை வெளிப்படுத்த தொடங்கினர்.

15-வது ஓவரில் டோனி ஒரு பவுண்டரியும், விராட் கோலி ஒரு சிக்சருடன் அடிக்க அந்த ஓவரில் 14 ரன்கள் கிடைத்தது. 16-வது ஓவரை கவுல்டர் நைல் வீசினார். இந்த ஓவரில் விராட் கோலி அடுத்தடுத்து மூன்று சிக்சர்கள் விளாசினார். ஆடம் ஜம்பா வீசிய 17-வது ஓவரில் 3 ரன்கள் மட்டுமே கிடைத்தது.

18-வது ஓவரை டி'ஆர்கி ஷார்ட் வீசினார். இந்த ஓவரில் எம்எஸ் டோனி இரண்டு இமாலய சிக்ஸ் விளாசியதோடு, ஒரு பவுண்டரியும் அடித்தார். இதனால் இந்தியாவுக்கு இந்த ஓவரில் 19 ரன்கள் கிடைத்தது. அத்துடன் இந்தியா 150-ஐ தாண்டியது.

19-வது ஓவரில் விராட் கோலி ஒரு சிக்ஸ், ஒரு பவுண்டரி அடிக்க இந்தியாவுக்கு 15 ரன்கள் கிடைத்தது. இதனால் இந்தியா 19 ஓவரில் 3 விக்கெட் இழப்பிற்கு 172 ரன்கள் அடித்தது.

கடைசி ஓவரை கம்மின்ஸ் வீசினார். முதல் இரண்டு பந்திலும் வைடு மூலம் இரண்டு ரன்கள் கிடைத்தது. அடுத்த பந்தில் டோனி ஆட்டமிழந்தார். டோனி 23 பந்தில் 3 பவுண்டரி, 3 சிக்சருடன் 40 ரன்கள் சேர்த்தார். விராட் கோலி - டோனி ஜோடி 4-வது விக்கெட்டுக்கு 50 பந்தில் 100 ரன்கள் குவித்தது.



அடுத்து வந்த தினேஷ் கார்த்திக் தான் சந்தித்த முதல் இரண்டு பந்துகளையும் பவுண்டரிக்கு விரட்டினார். கடைசி பந்தை விராட் கோலி சிக்சருக்கு தூக்கினார். இதனால் கடைசி ஓவரில் இந்தியா 18 ரன்கள் சேர்க்க 20 ஓவரில் 4 விக்கெட் இழப்பிற்கு 190 ரன்கள் குவித்தது.

விராட் கோலி 38 பந்தில் 2 பவுண்டரி, 6 சிக்சருடன் 72 ரன்களுடனும், தினேஷ் கார்த்திக் 3 பந்தில் 8 ரன்களுடனும் ஆட்டமிழக்காமல் இருந்தனர்.

191 ரன்கள் அடித்தால் வெற்றி என்ற இலக்குடன் ஆஸ்திரேலியா பேட்டிங் செய்து வருகிறது.

இந்தியா - ஆஸ்திரேலியா இடையிலான 2-வது டி20 கிரிக்கெட் போட்டி பெங்களூருவில் இன்றிரவு 7 மணிக்கு தொடங்குகிறது. இதற்கான டாஸ் சுண்டப்பட்டதில் ஆஸ்திரேலியா கேப்டன் ஆரோன் பிஞ்ச் டாஸ் வென்று பந்து வீச்சு தேர்வு செய்தார்.

இந்திய அணியில் ரோகித் சர்மா, மார்கண்டே, உமேஷ் யாதவ் ஆகியோர் நீக்கப்பட்டு தவான், விஜய் சங்கர், சித்தார்த் கவுல் ஆகியோர் சேர்க்கப்பட்டுள்ளனர்.

ஆஸ்திரேலிய கிரிக்கெட் அணி டி20 மற்றும் ஒருநாள் கிரிக்கெட் தொடரில் விளையாடுவதற்காக இந்தியா வந்துள்ளது. தற்போது டி20 கிரிக்கெட் தொடர் நடைபெற்று வருகிறது. விசாகப்பட்டினத்தில் நடைபெற்ற முதல் டி20 போட்டியில் இந்தியா 3 விக்கெட் வித்தியாசத்தில் தோல்வியடைந்தது.

2-வது மற்றும் கடைசி போட்டி இன்று பெங்களூருவில் இன்று நடக்கிறது. ஆஸ்திரேலிய அணியில் வேகப்பந்து வீச்சாளர் கேன் ரிச்சர்ட்சன் இடம் பிடித்திருந்தார். முதல் போட்டிக்கான பயிற்சியின்போது இவருக்கு காயம் ஏற்பட்டது. இதனால் உடனடியாக ஆஸ்திரேலியா செல்கிறார். ஆகவே, ரிச்சர்ட்சனுக்குப் பதிலாக அண்ட்ரிவ் டை அணியில் சேர்க்கப்பட்டுள்ளார்.

இந்தியா - ஆஸ்திரேலியா இடையிலான முதல் டி20 கிரிக்கெட் போட்டி விசாகப்பட்டினத்தில் நடைபெற்றது. இதில் முதலில் பேட்டிங் செய்த இந்தியாவால் 126 ரன்கள் மட்டுமே எடுக்க முடிந்தது. பின்னர் 127 ரன்கள் அடித்தால் வெற்றி என்ற இலக்குடன் களம் இறங்கிய ஆஸ்திரேலியா, பரபரப்பான ஆட்டத்தில் கடைசி பந்தில் வெற்றி பெற்றது.

2-வது போட்டி பெங்களூர் சின்னசாமி மைதானத்தில் நாளை நடக்கிறது. பொதுவாக சின்னசாமி மைதானம் சிறியது. மேலும் ஆடுகளம் பேட்ஸ்மேன்களுக்கு சாதகமாக இருக்கும். ஆனால் கடந்த சில ஐபிஎல் சீசனில் அதிக அளவில் ரன்கள் குவிக்க முடியவில்லை. ஆடுகளத்தின் தன்மை மாறியுள்ளது.

இதனால் நாளைய போட்டியில் பேட்ஸ்மேன்கள் வாணவேடிக்கை நிகழ்த்துவார்களா? என்ற எதிர்பார்ப்பு கிளம்பியுள்ளது. இந்நிலையில் பேட்ஸ்மேன்கள் நாளைய போட்டியில் அசத்துவார்கள். குறைந்தது 180 ரன்களுக்கு மேல் குவிக்கலாம் என்று கர்நாடக மாநில கிரிக்கெட் சங்கத்தின் அதிகாரி ஒருவர் தெரிவித்துள்ளார்.

இதுகுறித்து அவர் கூறுகையில் ‘‘ஐபிஎல் தொடரில் ஆடுகளம் அதிக ரன்கள் குவிக்க ஒத்துழைக்காமல் இருந்திருக்கலாம். ஆனால், நாளைய போட்டியில் அதிக ரன்கள் குவிக்கலாம். நாங்கள் இந்த ஆடுகளத்தை பயன்படுத்தி இரண்டு மாதங்களுக்கு மேல் ஆகிறது. கடைசியாக விஜய் ஹசாரே டிராபி தொடரின்போது பயன்படுத்தப்பட்டது. இந்த ஆடுகளத்தில் 180 ரன்கள் போதுமான ஸ்கோராக இருக்கும்’’ என்றார்.

இந்திய சுழற்பந்து வீச்சாளர் குருணால் பாண்டியா கூறுகையில் ‘‘நான் இதுவரை ஆடுகளத்தை பார்க்கவில்லை. ஆனால், விசாகப்பட்டினத்தை விட பேட்டிங் செய்ய சாதகமாக இருக்கும்’’ என்றார்.



ஆஸ்திரேலிய வேகப்பந்து வீச்சாளர் பேட் கம்மின்ஸ் கூறுகையில் ‘‘கடந்த சில வருடங்களாக இந்த ஆடுகளம் வேடிக்கை நிகழ்த்தும் விதமாக இருந்தது. நான் கடந்த ஏழெட்டு வருடத்திற்கு முன் ஐபிஎல் தொடரில் விளையாட வந்தபோது, 220 ரன்கள் அடிக்கப்பட்டது. அதன்பின் ஆண்டுகள் செல்ல செல்ல ஆடுகளம் ‘ஸ்லோ’ ஆனது.

விசாகப்பட்டினம் குறைந்த ஸ்கோர் போட்டி. ஆனால் சிறப்பாக இருந்தது. அதுபோன்ற ஆடுகளத்தை விரும்புகிறேன். டி20 என்றாலே யார்க்கர், ஸ்லோ பால் ஆகியவற்றிற்காக தயாராக வேண்டும், அனால், இங்கே நல்ல பந்து போதுமானது. கடைசி நேரத்தில் பந்து சற்று ஸ்விங் ஆனது’’ என்றார்.

இந்தியா - ஆஸ்திரேலியா இடையில் டி20 கிரிக்கெட் தொடர் நடைபெற்று வருகிறது. ஆஸ்திரேலிய அணியில் அலெக்ஸ் கேரி விக்கெட் கீப்பராக செயல்பட்டு வருகிறார்.

ஆனால் விசாகப்பட்டினத்தில் நடைபெற்ற முதல் டி20 ஆட்டத்தில் யாரும் எதிர்பார்க்காத வகையில் மிடில் ஆர்டர் பேட்ஸ்மேன் ஹேண்ட்ஸ்காம்ப் விக்கெட் கீப்பராக களம் இறக்கப்பட்டார். விக்கெட் கீப்பராக பணியாற்றிய ஹேண்ட்ஸ்காம்ப், உலகக்கோப்பைக்கான ஆஸ்திரேலிய அணியில் கீப்பர் பணியை செய்ய தயாராக இருக்கிறேன் என்று தெரிவித்துள்ளார்.

இதுகுறித்து ஹேண்ட்ஸ்காம்ப் கூறுகையில் ‘‘பேட்ஸ்மேன் பணியுடன் விக்கெட் கீப்பர் வேலையையும் சேர்த்து என்னால் செய்ய முடியும். ஆனால், அதற்கான உடற்தகுதியை பெற்றுள்ளேனா? என்று பார்க்க வேண்டும்.

இந்தியாவிற்கு எதிரான 50 ஓவர் கிரிக்கெட் போட்டியில் விக்கெட் கீப்பராக களமிறக்கப்பட்டால், கீப்பிங் பணியோடு நான்காவது அல்லது ஐந்தாவது இடத்தில் களம் இறங்கி சிறப்பாக பேட்டிங் செய்து, விக்கெட்டிற்கு எதிராக சிறப்பாக ஓடுவது குறித்து விஷயங்களை பார்க்க வேண்டியுள்ளது. அணிக்காக எல்லாம் சரியாக அமையும்.

டி20 போட்டியில் விக்கெட் கீப்பராக செயல்படுவது மிகவும் கடினமானது அல்ல. ஏனென்றால் 20 ஓவர்கள் மட்டுமே விளையாடினால் போதுமானது. ஒருநாள் போட்டி சற்று கடினமானது. குறிப்பாக இந்தியாவில் வெப்பம் அதிகமாக இருக்கும். அத்துடன் சுழற்பந்து வீச்சுக்கு சாதகமான ஆடுகளத்தில் பணிபுரிய வேண்டும். ஆகவே, கடினம்தான். இருந்தாலும் நான் அதை எதிர்பார்த்துக் கொண்டிருக்கிறேன்’’ என்றார்.